不止嗅到了，已看到了

半年前寫過，中國政府有意改革打破中移動的攏斷，最差的情況是把服務供應和網絡供應分家，竟然一語中的，今天出台的消息是中移動需要分享網絡予對手使用。

http://stock.nanaland.com/?postid=41

今天的看法稍有不同，試諗下定政策o個個想做o的咩？

因為移動通訊已經係民生必需品，所以無可能係一網獨大，但現況好明顯細o既網又唔好囡又唔夠，所以至掟五百億比佢建網；建網唔係一時三刻可以做到完善，要即時見效就要借移動個網。要建立完善o既網絡，五百億只係杯水車薪，響呢個大前提底下，細網要得到一個穩步增長o既現金流至可以獨立生存，所以借網呢個措施「一定」會以「平民價」實現。

咁典解話只係死一半？因為個目標係「賺錢建網」，所以唔會打價格戰，只係中移增長率會減慢，ARPU 應不受影響，以林蛇口吻就係變成跑慢左o既千里馬。呢隻千里馬會唔會跑快番？我相信要睇兩年後 TD 的普及同賺錢程度而定。

響呢個情勢下，我會繼續持有手上僅有的兩手 941 (平均價 $83)，但不會增持。

當堅持到了盡頭

我不是個勤力的員工，但自問是個盡責的員工，可是當一個項目不是我個人可以完全控制的話，所作的承諾便每每落空；當承諾一一落空，剩下的便是令人失望的感覺；作為項目的舵手，還是要承擔最終的責任。

經過不斷又不斷的挫折，手上的項目終於差不多到完結的時間，一直堅持著完成項目才離開，不要爛尾，可是結果還差一點點時間才功德圓滿。堅持到現在，開始發覺身體出了毛病，而且明顯是壓力導致的問題，沒有妥協的餘地，必須要辭職，必須要減壓。

燃燒金錢、健康與生命

今個禮拜過澳門裝新系統，點之出師未捷，去碼頭落的士時要兼顧的行裝，唔小心留低左個電話響架的士度，過左兩分鐘打返去已經熄左。埋單，部機日租為 $12.5．．．

星期三清晨搭夜船過去開始安裝系統，原本諗住星期二響公司做半晝野就返屋企休息，結果 OT 到夜晚十一點，返到屋企換完衫已經要出門口，裝完系統到順暢運作已經係下晝六點鐘，完來已經三十六個鐘頭無訓過，呢個年紀簡直係燃燒健康。

返到酒店即刻訓番五個鐘，十一點到又落去睇埋數，點之一鑊粥，結果搞到第二日下晝五點，頂唔順去食o的野先，原來不經不覺已經係饑饉廿八，直情係燃燒生命！

第二日埋數依然出問題，到星期五傍晚至執番正，趕返香港同朋友慶生，忘記下呢幾日o既煩惱。

點之星期六朝打番去問，個日結又唔掂，唯有又過去望望，今次個問題比較簡單，所以可以即日走，但 teammate 們今次竟然肴底主動話睇埋 dayend 至走（因為前兩次係佢地出錯），唯有比信心佢地：今次我地做埋 dummy test 都叫正正常常，所以如果真係有事就應該係其他原因，「其他原因」o既發生係無人預計到o既，所以 standby 幾多日都係無意義。如果再留，唔係燃燒生命咁簡單，而係比埋條命你囉．．．

把一年縮影到一星期

今個星期過了澳門工幹，因為太忙，眼見 9/17 大跌也沒有時間去網吧下買盤，結果回到香港看著 portfolio 竟然沒變化過！等了多個月的跌盤，$26 與 $23 的中國人壽，買不到，有一點不甘心。

一個星期的波幅幾乎等如一年那麼大，可見只要有耐性，即使是熊市，只要你手上的是強中之強，一定不會被大浪吞噬。AIG 不是強中之強嗎？我相信它曾經是強中之強，但已變成強弩之末；因此單靠東尼那種看 PE，MOS 的理念來找尋強中之強始乎尚有盲點，用基本分析應會好得多。

火麒麟

小時候父母有時稱我為「火麒麟」，寓意「週身癮」，不錯，小時候對每樣事情都十分好奇；除此之外，他們卻說我是「三分鐘熱度」。那個時候，一時嚷著學單車和買單車，一時嚷著買電子琴，雖然不至於「三分鐘」那麼短，但買了之後只在初時幾乎不眠不休地玩，過後便被打入冷宮。我之後對這個批評很著意，因此決定改變，壓抑喜愛新東西的衝動。

到了高中，真正喜愛的東西只剩下凡是男孩都迷上的東西：電腦與遊戲機，大學時期又愛上 para para；到了現在，喜歡的仍然喜歡，我相信壓不下來的才是真真正正自己喜歡的，所以一旦愛上就一直愛上，我不知道這是好處還是壞處？

四個月前的一次大災難曾經打動幾乎每一個人的心，但到了現在還有多少人記得？到了現在還有多少人關心？還是只是「三分鐘熱度」？

投票選廢人

上屆立法會長毛竟然可以當選，大家都認為係因為見到立法會已經無乜用，所以寧願選個「廢」的「狗 up」下都好過選o的做左十幾年都係咁樣o既人，更深層意義係為左表達對立法會機制o既不滿（原因：功能組別＋分組點票）。

今屆我以為大家已經表達過一次不滿，而且政府又好聰明咁選舉前減低社會怨氣（例如：派錢，唔提o的有爭拗o既法案），所以選舉氣氛好差，響呢個情況下，照計長毛呢o的為左消消氣而選佢出來o既人會消失晒。

一睇結果，佢竟然可以成為新界東泛民主人的票王，連同九龍西的黃毓民一齊「大勝」，似乎選民已經在五年前七一後被啟發，所要表達o既係已經完全對現有制度失望，期望選更激進的人突破目前o既困局。

咩人會選長毛？佢無乜地區政績，無搞蛇宴旅行團，無乜錢同無乜人選舉，所以我相信投佢地o既係呢五年至開始投票o既人（即係年青人），又或者係對所有其他候選人都失望o既成年人，但以得票率睇，似乎前者多o的。

X - Y 世代的年青人（16-28 歲）同上一輩有好大代溝，好多人做過雙失青年，面對前路茫茫，眼見而家政府做o既野對佢地來講無用（例如：再培訓局竟然「再」培訓o的未做過野o既年青人，個個報o既都知無用，只係想拎少少車馬費使下），佢地o既語言係 orz 文，日日上網吹水，所以可以一呼百應叫大家出來投票，佢地o既選擇一定唔係請食蛇宴，平步青雲，做過政治助理o既民建聯陳克勤，亦都唔會係一班專業人士老餅，因為佢地無o個種「down to earth」o既 feel，除左長毛，仲有邊個比到佢地共嗚？

黃毓民則除左有「down to earth」o既感覺，佢對政治認識o既深度同踢爆人地虛偽o既表達方法可以得到好多中產同知識份子o既認同（畢竟響大學教過傳理系又做過咁多年清談節目），所以由深水步到黃埔都可以拎到好多票，香港人好識諗，即使明知選你出來都係勢孤力弱，但只要你可以幫佢消消氣就得，就算政府打橫來行，都唔可以好似廿三條咁大大聲講「麥當奴待應、駕的士的點會明？」。

全港百幾萬人選的只係三十個直選議席，但就有十二個保皇黨響功能組別自動當選，呢個係咩世界？點解仲要投票？無錯，只係為左啖氣！

問．蒼．天

我不太相信求神問卜的事，但這大半年面對了太多不如意的事，已經厭倦了為著每天打算、沒有自我的生活，如何可以再緊抓自己的路？趁著假期找了點時間去求韱，就看看上天怎麼說：

事業：劉向得志（上吉）

愛情：武則天賞花（中吉）

媽媽的健康：貴妃自縊（下下）

上吉和中吉雖好，什麼也不做的話求的多好也沒用處；下下自是不好，但難道什麼也不做嗎？

失色了

今日再到麻布茶坊飲藍山一號，怎知已失去昔日的味道，味道仍是藍山一號，但冰冰冷冷的一杯，味道淡了一半，多了白開水的味道，就像是把半杯咖啡開成一杯，而那種嚐後餘香的感覺卻不見了。

我不是經常品嚐，所以不太介意它是五十元或是八十元，但現在卻飲不到那種味道來，除了自己沖泡外，現在知道的只餘下兩個地方可以飲到，一個是咖喱物語（聽說搬家了），另一個是天后茶室；什麼時候再嚐得到呢？

你愛香港？

小時候一直接受植民地式教育，授予的都是著重知識，到了工作時，學習到的都是工作技能，目標著重於：改善個人的生活；從來沒有學習過、思考過如何令生活環境更好、令社會更和諧，這就像跟自己沒關係似的。

生於斯，長於斯，數年前在經濟不景時也想過香港的根本問題是什麼，很多歷史，很多因由，相信要說的話一本書也說不完，結論只有一個：為了中國政權穩定，唯有犧牲香港的長遠發展。為了令香港人妥協，中國政府把金融政策傾斜，令香港人繼續陶醉於昔日只管賺錢不管政治的時代。

可是，這是我理想的家嗎？

當五十萬人上街，在位的可以充耳不聞。
當政府把總部設在二百億的昂貴土地上，專貴的議員竟然通過。
更不要說官商的利益輸送，數碼港、西九文娛藝術區，到最後又不是一個平價賣地、貴價賣樓的豪宅？

為什麼會這樣？

因為遊戲規則不是你和我想的那樣．．．

政府要通過議案要一半議員贊成，但卻只有一半議員是我們投票選出來的，在這個情況下，要全民投票選出所有「非保皇黨」在能「反對」政府的動議，這是一個什麼的世界？

詭譎的是，這個遊戲規則是在回歸首兩年由「保皇黨」在「臨時立法會」訂下的。

更詭譎的是，「保皇黨」上一界沒有反對政府「任何」議案，而所謂的「反對黨」亦只有 10% 議案反對，選「保皇黨」有什麼用？

星期日是投票日，請務必投票，表達你與我的素求！