EQ

唔知朋友們點睇，自覺大部份時間我的 EQ 都係好高的，因為由細細個開始已經被母親大人潛移默化咁用「串嘴」代替左「鬧人」。我依希記得的只係每次鬧人都會令情緒好激動，跟住幾個鐘頭全身感覺會好唔舒服。

星期六食 brunch 排長龍，因為言語上有誤會，令排前面o既兩個人以為我地打尖入去先，個阿姐即刻好惡咁話要排隊，我聽完之後突然間諗起上一次去都見到類似o既情況，所以就即刻叫阿姐入去先，似乎等位係一個緞練 EQ 的好地方。

呢幾日將屋企條電話線轉和記，$38 一個月！！價錢好吸引，用落卻好多問題，轉左之後竟然拎起聽筒至上到網！隔左幾日師傅再上門裝個分線盒仔，可惜結果都唔得，再打上去 hotline 問，接線哥仔話幫我做分線，即係電話同寬頻唔 share 線，理論上就唔會互相影響；點之駁去技術哥哥度，佢竟然話唔可以分線住，要再搵師傅上來 check 多次，呢個時候即係剌激到我o既串嘴神經．．．識我的都知道我講野有幾慢，其實只係因為我習慣將o的說話 rephrase 到「體統」又「圓滑」，所以每講一句說話都要 process 好耐．．．當然剌激到我o既串嘴神經就即刻以一輪嘴的速度同「禮貌得來加大量骨頭」來同阿哥仔講數，結果阿哥仔即刻肯同我分線。

唔鬧人還唔鬧人，當黑起面上來都係好嚇人的，幾個月前剛剛返新工，懷著死狗的心情返工，第一日同各同事 say hello，個同事就已經半開玩笑咁話好驚我，好似好惡咁o既樣，我相信頭兩個月我個樣真係好嚇人。