AQ

細個到大個都無乜經歷過逆境，所以 AQ 有幾高都唔係好清楚，有印象以來只係得三次算係逆境。

第一次係中七放榜時，由於已經 repeat 過一年中五，所以壓力總有一點，可是最後成績都唔係咁好，我o既選擇係自修一年，或者出來做野，後來我揀左自修，不過好肯定咁講，自修真係好難！結果最後只係入左 City 的 HDCS，回頭睇番，如果要入 City 的 HDCS 的話，重讀中五到自修中七o個四年可以慳番，當然時光唔可以回頭望。

第二次係沙士時，IT 經歷完科網後已經重傷，沙士前成間公司的開發部摺埋，跟住就搵左差唔多半年工，期間可以好閒逸咁過，因為 jobsdb 每日都係得幾份工咁大把。呢段期間我每隔一段時間就將個人工寫低o的，不過幾個月夾埋都只係得幾份工有得 in，好彩的係前一份工有一筆幾個月的尾糧可以咬，唔好彩的係到我搵到工時已經好似讀建造業訓練局個哥仔咁講：「人工仲．．．哈哈哈！」，其實全靠 Karen 姐姐同 Rickey 哥哥至搵到份工呃下飯食，請受 LaaLaa 一拜～～～

半年前做完「無得撈啦」，可以話係雙喜臨門，一來又再感受下幾年未試過o既搵工滋味，二來就感受埋失戀o既滋味，一日 24 個鐘頭咁多你話幾好用呢，除左幾套外國連續劇，全港放映中同不日上畫o既電影我都睇晒咁滯，曾幾何時友人話出去睇戲我套套都睇過，到最後揀左一套去睇，開場後半個鐘至發現原來呢套都已經睇過。

新工作要對住一堆無辦法解決o既問題，仲要 lum 下個客話佢知「有 UA 無問題」～～過住拖得一日得一日o既生活，好彩老闆都知道呢隻係鑊無比到壓力。上星期五過澳門原本係被插大會，雖然主題係講新 project，但如果個客提起舊鑊的話都無野好講，好彩去澳門前 marketing 姐姐肯將個新人放來接住個燙手山芋。

呢幾樣野都唔係好大件事，回顧起來，最重要的只得一樣：「向前望吧」！