魔鬼在背後 (2)

八個月前大膽預測，因為陳冠 A 的事件，政府會「做o的o野」響明年一月立法，美其名係「防止色情資訊氾濫」，實際上係為左加強監察互聯網舖路。

立圾會選舉o岩o岩落幕就即刻出呢個政策，始乎阿爺好在意而家香港互聯網資訊流通o既「不可控制性」。試諗諗回歸之後，仲有幾多份報紙敢鬧共產黨？仲有邊個電視台同電台敢訪問黃毓民叫佢發表政治意見？傳統媒體基本上已經被中共「統戰」晒，剩底o既地域就只有互聯網一個。

而家互聯網o既網民可以因唔同事一呼百應自發組織起來，好似迷你債券o既苦主咁，幾日就可以 group 到幾百人，唔需要靠議員幫手，只要響幾個香港人經常聚腳o既 forum 登幾個 post 就可以。

如果要一下子打壓言論，香港人一定會有好大反彈，結果就同五年前廿三條立法咁下場，所以今次用反色情訊息氾濫為由做試金石，之後慢慢收緊，就可以做到溫水煮蛙o既效果。

用反色情訊息氾濫為由至收緊互聯網，一來可以「名正言順」，二來可以得到廣大唔熟悉互聯網o既「上一輩人士」支持，唔掂又可以來個「民意調查」：

1. 你覺得小朋友應唔應該接觸到互聯網o既色情訊息？
2. 如果可以令小朋友接觸唔到互聯網o既色情訊息，你願唔願意響發佈或取得呢類訊息時証明你係成年人？

第二日響報紙報導：「超過九成受訪成年市民贊成限制互聯網發佈色情訊息，亦有超過八成人認同於使用互聯網時應提供更多個人資料」，唔好以為呢樣野未發生過，而家除左港大鍾庭耀仲可以較中肯咁做調查，其他政府或者大學o既調查都已經變晒質。

出年一月立法應該都勢在必行，會唔會又中多次，後年來個「加強版」？拭目以待。

http://www.new.facebook.com/note.php?note_id=12137286202