中古貨品

好多年前開始已經用拍賣網買賣, 通常都係賣o的唔用o既電腦野, 一來趁未眨值時拎番o的 cash, 二來又唔使放響屋企度阻掟.

有一次屋企個電視盒壞左, 媽媽竟然手快快買部迷你電視機返來, 部電視機要來做裝飾都還可以, 要來睇就睇到眼都矇, 所以我就響換左個電視盒之後就快快手賣左部迷你電視. 部電視賣到七十蚊, 買的人係一個中學女生, 響交易時我感覺到佢買到呢部電視o既心情就好似收到一份珍貴o既禮物一樣. 但響當晚佢打電話比我話部電視唔 work, 由於我好肯定 packing 前一o的事都無, 所以而家有問題都唔知咩事, 亦可以話愛莫能助, 但係響o個刻就感受到佢失望的心情.

收左線之後我個心好唔安樂, 理性話我知我無做錯, 但感性話我知我將一個人由雲霄拉到落谷底. 七十蚊可能對你同我來講都唔算咩錢, 但對於一個貧窮o既學生來講可能都要儲一頭半個月.

自此之後, 我響賣野時一定會叫個買家試清楚, 雖然我好肯定賣o既野係 100% work, 但唔想再發生同樣o既事情. 有一次陪朋友賣相機, 我叫個買家應該點樣點樣試機, 睇到個朋友滴晒汗 ... 「如果真係有問題賣唔出點算?」 ... 我無諗過呢個問題 ...

呢幾日幫朋友賣幾樣舊野, 其中有兩個買家比我o既感覺就好似當日o既中學生咁. 一部外殼已經殘舊不堪o既電話, 被買家接到手上時兩眼溢出極度滿足同喜悅o既神采, 佢拎到手上後就不停試不同功能, 又問我可唔可以轉簡體, 點樣過相等等 ... 因為我都玩過下部機, 所以識答的都盡量滿足佢.

呢兩個買家可能因為買唔起至退而求其次買二手, 所以對呢幾樣中古品都流露出滿足同喜悅o既面容. 對我來講, 即使係新品, 已經好耐無呢種感覺, 因為出來做o左o野, 雖然人工唔高, 但又唔算捉襟見肘, 要買的話都買得起; 所以響呢幾次交易我深深感受到「珍惜」o既重要, 因為你可能覺得唔係乜野, 但每一樣野其實都得來不易的.

珍惜你擁有o既一切 ...