搓 your breast ...

仲讀緊 city 時成日玩 bbs，經常同網友講人生道理，經過多年我已經漸漸遺忘，到而家卻一句又一句諗起上o黎，其中一句係「try ur best, never regret」。

「盡o左力就算啦」，無錯，盡o左力，但結果不如人意，仲可以點？你仲想點？

臨轉工時香港仔神婆幫我占事業，其中一張講現況o既牌係描述一個響大風雪下響街度獨行o既人，好準！當時同事仔唔聽指示，個客唔識做 project 又唔聽你支笛，結果「兵行險著、破斧沉舟」出街o既系統錯o左o的最重要o既野，老細當然唔高興，但我卻「無能為力」。

客人唔滿意，老細唔滿意，連o的o靚都唔滿意，有問題o既一定係自己，我相信問題出o係「將腐竹當陳皮」上，最初開波時我話，之所以要比一萬蚊人工而唔請三千蚊人工o既內地 programmer，係因為香港人係用腦諗野o既，我當時希望佢地明我講乜，不過似乎係「不能也、非不為也」，結果做唔到「港式 programmer」之餘仲搞到無晒 team spirit。如果時間可以倒流，我會點做？我會響佢開始唔聽教時踢佢走。當日我無咁做，係因為我相信佢係「香港 programmer」，比自由佢發揮應該會好過樣樣捉得咁緊。

前兩日諗番起呢句金句，思考過一陣，覺得今次已經盡晒力，今生無悔。