一美元上的是誰？

尋日同朋友坐的士，因為佢響外國返來無港紙，所以就比左張一蚊美金我，令我諗起貧民富翁個主角點解知道一百蚊紙上面係邊個o既故事。一套感覺強烈的電影，又係講面對貧窮生活o既故事，比起上年的 CJ7 同前幾年的 persuit of happiness 所面對的仲慘，事實上我相信響好多發展中國家過緊呢種生活o既人比比皆是，戲裡面就大團圓結局，現實就可能萬中無一，所以能夠生活響香港，唔使擔心無瓦遮頭，又唔使擔心無飯開已經係好幸福o既事。

提外話，如果呢班響銀紙上出現o既總統仲在生的話，唔知應該開心定唔開心，開心係因為呢幾十年間佢地個樣係咁加印，唔開心係佢地每日都眨緊值，越來越唔值錢。

梅菲的毒咒

今日下晝約左 vendor 整野, 個 procedure 話要 download 個 file 放響 server 度, 我諗住 download 定, 但 down 唔到, 所以就問 vendor, 佢話佢會帶來。呢個時候我已經有疑問佢帶來點放落部機呢? 因為係第一次同呢個 vendor 落 site, 所以就信佢o既 expertise。

到左今日, 一切諗得到o既問題都發生晒, 佢帶隻手指來, 但部 server 唔食指的, 用另一部機抄, 又無 tools 可以抄過去 ...

梅菲, 你好得, 又學到野了: keep everything clear at first moment!

食滯o左

呢排早餐經常食的係美心的芝士三角，佢係一件約 20cm x 25cm 的芝士飽，入面有好多車打芝士，食完呢個飽通常到 lunch time 都唔會肚餓。

上個禮拜四件芝三角o既芝士竟然比平時多好多，結果食完之後肚漲到 lunch，食滯o左！已經好耐無食滯，因為食齋食好多都只會覺得飽，唔會有「頂住個胃」o個種感覺，但今次個芝三角實在太勁，所以搞到 lunch 都無食直到夜晚。

呢幾日就乖乖地買返o的正常 size o既芝士飽做早餐，九點幾食完，到十一點幾就見肚餓，點解唔整o的中間 size o既呢？

懶蟲是會越養越大的

原本諗住上個禮拜頭去跑步，維持一個禮拜一次，同每日都響屋企沖咖啡，不過拖下拖下就拖左成個禮拜

星期一：同朋友食飯
星期二：打喪屍
星期三：同朋友食飯
星期四：買送煮飯，搞下搞下又好累
星期五：同朋友食飯，之後又打喪屍
星期六：之前一晚打得「早」得滯，精神狀態唔好（勉強跑的話好易瘁死o架）

就係咁拖左六日，到左星期日終於的起心肝，仲做左好多野，食完 lunch 就沖咖啡，之後去公園睇書，買送煮飯啦，洗衫啦，到夜晚就終於落去跑，返到屋企再 send 個拖左成個禮拜o既 video 比朋友，突然間覺得成個禮拜過得最充實的係呢日。

隋性

前兩個禮拜因為馬拉松，所以就響馬拉松前休戰一個月，點解？因為我無跑，但平時跑開o既地方就多o左好多人，咁所以就讓條路比人啦，無謂阻住人發達。

人係有隋性o既，一唔跑開就無動力去跑，原本諗住馬拉松之前o個晚開始跑番，結果一日拖一日，拖到上個禮拜至開始跑；無跑一排好明顯耐力差o左o的，只係跑到 3.x 公里，今晚再跑過！

小店是寶

上個禮拜放工搭車返屋企, 響旺角東站有個後生女上車, 引起我注意的唔係佢o既外表, 而係佢拎住o既「大快活」外賣, 佢同我一樣都係響太和落車, 旺角東到太和o既車程差唔多半個鐘, 如果計埋等車同返屋企o既時間就分分鐘九個字到一個鐘頭, 點解佢會拎住盒外賣搭咁耐車?

因為太和唯一o既商場做緊大型裝修工程, 幾乎所有舖頭都拆晒未開番, 如果要去外面買野食就要行多一兩個字, 我諗因為咁所以佢就響旺角買左拎番屋企. 裝修工程會做到年底, 裝修完唔代表呢個情況會改善喎, 而係代表更加無野食. 商場原本的特式係吸納好多高質素o既商戶, 吸引外區客, 從而帶起o個區o既租值. 當越來越多商場出現, 除左傳統o既購物區外, 所有商場o既店舖幾乎都係一式一樣, 吸引唔到外區客, 結果只係只得o的無特式o既大集團經營. 奈何呢個區o既居民普遍收入唔高, 整靚個商場係唔會點增加租值o既, 只會多o左居民去區外買野, 因為呢區o既居民時間成本唔高.

好懷念個商場未裝修前o既一間茶餐廳, 裝修唔靚, 但整得超好食, 大集團又點可以做到「超班」o既水平?

久遺了的感覺

很多年前有一種想法，與女孩子之間存在著無形的隔膜，因是「吃素」的關係 ，有很多交際的活動也受限制，最刻骨的一次是在平安夜與一個女孩外出，本應是一個開心的晚上，但當晚所有餐廳都只供應「聖誕大餐」，我只可以跟她到一間泰國菜館吃「泰國菜」，氣氛十分之差，之後衝衝的走過海旁便分道揚鑣。感覺很差，但卻無能為力，我想就像一個「殘疾人士」所面對的一樣，這種應覺直到工作後數年才減退，這多得朋友們的諒解和遷就，每一次我都十分感謝你們，但亦覺得過意不去。

前陣子有一次聚會，與一位新相識的朋友，在傾談間竟發現他雖然不是素食人士，但卻知道我要面對的這種感覺，畢竟對於新朋友，通常只會問我「為什麼食素？」，而這位新朋友竟知道我這個從沒告訴過別人、曾經困擾著我多年的感覺。